| O Concello de Forcarei xa ten todo preparado para a a próxima Xuntanza dos Maiores, que se celebrará o vindeiro 7 de marzo no Mosteiro de Aciveiro, e será gratuíta. E para conmemorar a XXX edición da festa haberá unha madriña de excepción: a artista Pili Pampín será a mestra de cerimonias. A xuntanza terá lugar no marco do entroido, o venres 7 de marzo, ás 14.30 horas no Mosteiro de Aciveiro (apertura de portas ás 13.30 horas). As persoas interesadas en asistir xa poden formalizar a súa inscrición no Concello. Só teñen que cubrir o formulario dispoñible nas oficinas xerais da casa consistorial ou aquí: MODELO INSCRICIÓN NA XUNTANZA DE MAIORES 2025, e presentalo por Rexistro. O prazo para inscribirse estará aberto do 19 ao 28 de febreiro. Haberá aforo limitado de 300 persoas. Para poder asistir á XXX edición desta xuntanza hai que cumprir unha serie de requisitos como estar empadroad@ no Concello de Forcarei, ser maior de 65 anos, ou menor coa condición de pensionista, ou persoa con discapacidade recoñecida. Como en anos anteriores, o Concello poñerá a disposición das persoas participantes un servizo de autobús para o desprazamento. A alcaldesa de Forcarei, Verónica Pichel, quere animar a todas e todos os maiores do municipio a que participen nesta festa. “Queremos que todas e todos gocen dunha xornada inesquecible, que coman, que bailen, que rían… Prometemos moita festa, moita troula, boa comida, un escenario privilexiado e moitas sorpresas”, anunciou. “Celebramos trinta anos de xuntanzas para homenaxear ás nosas e aos nosos maiores e estou convencida de que será un éxito”, recoñeceu Pichel. |
O próximo 7 de marzo Forcarei celebrará a XXX Xuntanza dos Maiores
18 de Febreiro de 2025
